South Africa West Coast

My Pa, die storiemaker

"Want ek besef algaande: Bladsy na bladsy is SKATER nie alleen die heel snaaksste humorstories wat ek ooit gelees het nie - dis ook hierdie bobaas storiemaker-pa van my se unieke lewensverhaal wat hier ontvou.

"Na vyf en veertig vrugbare jare van skryf en stories vertel, is dit gepas dat die stewige bundel juis verskyn in die jaar waarin hy vyf en sestig word. Maak toe die kinders (en kleinkinders) se kamerdeure en wees voorbereid op langdurige, skaterende genot."

Lees 'n kort uittreksel: Die Langana van Saldanha

Maar 'n kreefspietkop is nie kwaadaardig nie, soos oom Piet Toss van Velddrif sou sê. Moet tog net nie kom met allerhande storietjies oor die goed wat jou wou aanval daar waar jy ewe onskuldig op 'n Sondagmiddag jou Rapport op die klippe gesit en lees het nie.

Of vertel van jou siek tante wat buite seisoen dringend die ses en twintig ondermaat wyfiekrewe vol eiers nodig gehad het om op daggablare te trek vir haar liddoring nie.

Dan besluit so 'n kreefspietkop perdalks net daar en dan om kwaadaardig te raak.

Soos hulle geraak het met die langana, die viskoper, wat sy bakkie in 'n woeste jaagtog daar bo teen Saldanha se hoë kop omgegooi het.

"Nie," sê hy toe die uniforms hom daar onder die treinspoor, waar hy ooplê soos hy hardloop, aan die baadjiepante beetkry - na hy sy gevalle voertuig versaak het.

"Hoe sil ek nou wiet waa' kom al daai kriefietjies vedaan wat soe oer die pad loep daa' boe tussen die klippe? Yt my lorrietjie yt het hille nie geval nie. Al wat ek op hom gehet het, was hu paar' waatlemoentjies en hu snoekie. Maa' krief? Op my lorrietjie? Nie van hu dag oud nie. Dit swee' ek.

"Dis net lit ek soe ommie draai kom, toe sien ek hierie dysende kriewe wat soe oer die pad loep, dis net voeter waa' djy kyk. Ek wou hog hu U-turn maak, toe skied daai lorrietjie van my soes hy gly innie krief, dis net kriefsop everywhere. Wiet menee' miskien hoelat hu lorrietjie op soe hu gladde spul kriefsop annie gly kan gaan?

"En dis hoelat ek toe soe slaaitly van hu êksidint gelat happen het, menee' sien, mit al die geglyery tissen daarie dysnde kriewe deur wat soe die hiele teerstraat vol rondloep, ewe never djoe maaind, mens sou sê hulle is maa' net op hille se gawoene Saturday afternoon se bit of a stroll yt om hulle se windowshopping te gan doen."